O vindeiro martes 22 de xuño ás 20.00h no Salón de Actos do Hotel
Araguaney preséntase en Santiago de Compostela Os eidos. Libro del
Caurel na edición bilingüe da editorial Árdora (www.ardora.com).
Participan José Luis Gallero (editor), Lupe Gómez (poeta),Herminio
Barreiro (escritor) e Ignacio Castro (filósofo).

“É case un tópico dicir que Os Eidos, Libro del Caurel, é un texto
senlleiro na poesía galega dende fai cincuenta anos, parte e retorna a
un mítico lugar natal. As rochas, a toponimia, a rotación das
estacións resoan como estados de ánimo dun ser vivo chamado Terra”,
escribe Ignacio Castro no prólogo desta primeira tradución ó castelán
da obra capital de Uxío Novoneyra (1930-1999). O poeta lucense
entrenza nos seus versos a tradición galaica e oriental, alumeando
composicións emparentadas cos haikus, non só pola súa brevidade, senón
polo seu maxistral equilibrio entre o sensible e o abstracto.
Novoneyra non traballa coa especialidade da linguaxe, senón con algo
elemental, próximo ó incomunicable, que presta atención á vibración
das cousas humildes e as ama na súa inevitable finitude.